Aritz Juanenea saldiastarrak eskarmentua baliatu zuen Azpirozi 30-15 irabazteko, Kutxabank Torneora sailkatzeko ligaxkako lehenengo partidan. Ligaxka Juaneneak, Azpirozek eta Josetxo Ezkurra II.a doneztebarrak jokatuko dute, eta bertatik aterako da Kutxabank Banakako Torneora sailkatuko den erremontista, Ansa II.a, Urriza eta Barrenetxea IV.arekin batera arituko dena.
Juaneneak pauso garrantzitsua eman zuen atzo txapelketara pasatzeko, Azpiroz gainditu ondotik. Juaneneak lau puntu ditu. Juaneneak dena ongi egin zuen eta markagailuak nagusitasun argia erakutsi zuen. Bikain atera zuen, ongi aritu zen errestoan, piloteoan nagusi izan zen eta Azpirozek baino abiadura handiagoa eman zion pilotari. Azpirozek ez zuen inoiz bere jokoa inposatu.
Saldiasko atzelariak 17 tanto ere egin zituen piloteoan, sakearekin hamar tanto egin eta bi huts egin zituen. Egin zuen guztia ongi egin zuen. Azpiroz oker ibili zen taktikoki. Hamaika tanto egin zituen piloteoan, baina saketik bakarra. Emaitza honekin, Uitzikoak, aukera gutxi ditu ligaxka gainditzeko eta Juanenea eta Ezkurraren arteko partida erabakigarria izan daiteke.
Segurolak eta Barrenetxeak irabazi dute estelarra
Binakako estelarrean Segurolak eta Barrenetxeak 40-31 irabazi zieten Urriza eta Martirenari. Partida estua izan zen 30-28ra arte, baina azken zatian gorriek ihes egin zuten markagailuan eta lehia irabazi zuten. Segurola eta Barrenetxea aurkariak baino hobe aritu ziren eta gorriek egindako hutsek soilik mantendu zituzten urdinak partidan. Seguruago agertu zirenean, Segurolak eta Barrenetxeak partida hautsi zuten.