Bai Euskararik ematen duen ‘Zerbitzua euskaraz’ zigiluaren jabe da Sasoi
Malerrekako Sasoi enpresak 2011n eskuratu zuen Bai Euskarari ziurtagiria, ‘Bidean’ mailan hasi ziren eta urratsez urrats joan dira ‘Zerbitzua euskaraz’ eskaintzeraino. Langileen arteko harremanak eta bezeroekin dituztenak geroz eta euskaldunagoak dira eta horrek bultzatu dituzte beste pauso bat egitera. Konfiantza eta hurbiltasuna ere eman die horrek, kanpo zein barne harremanetan.
Elhuyarrek 50 urteotan egin duen bide oparoa saritu du Bai Euskararik
Euskara eta zientzia uztartzeko sortu zen Elhuyar duela 50 urte eta harrezkero bide oparoa egin du erakundeak. Erreferentzialtasuna lortu dute zientzia arloan eta beste hainbat proiektutan murgilduta daude. Erabateko eraldaketa garai honetan, bereziki euskarak sekulako erronka du. Ezagutzaren bidean gizarteari ekarpena egiten ari da Elhuyar, egiten eta eragiten.
Gazteen artean euskararen erabilera areagotzeko ekimen estrategikoa da EuskarAbentura
EuskarAbentura uztaila osoan zehar Euskal Herria oinez eta euskaraz zeharkatzen duen espedizioa da. Euskal Herriko eta diasporako 16 eta 17 urteko gazte euskaldunek parte hartzen dute bertan eta gazte askok euskaraz bizi daitekeenaren froga positiboa jasotzen dute. Gazteen artean euskararen erabilera areagotzeko aisialdian eragitea ezinbesteko da eta EuskarAbenturak zuzen-zuzenean eragiten du euskararen presentzia handitzeko.
Egiten eta eragiten dugulako gara
Orain dela 22 urte Bai Euskarari Ziurtagiriaren proiektua abiatu zen leku berera itzuli da aurten Bai Euskarari Sarien ekitaldia ospatzera. 22 urte pasa dira arlo sozioekonomikoan euskarari BAI erran eta lehenengo 231 gizarte eragile haiek konpromisoa hartu zutenetik, eta agerikoa da urte hauetan Bai Euskarari Elkarteak alor sozioekonomikoaren euskalduntzean gizarteari egin dion ekarpena. Agerikoak dira, era berean, une honetan Bai Euskarari Ziurtagiria duten 1.318 entitateek egindako urratsak eta lorpenak.
'Egiten eta eragiten dugulako gara'. Horixe da aurtengo Bai Euskarari Sarien banaketa ekitaldirako aukeratu duten leloa. Rober Gutiérrez, Bai Euskarri Elkarteko zuzendariak ekitaldian aipatu duenez, Bai Euskarari Ziurtagiriarekin hasi zuten ibilbidea eta «alor sozioekonomikoaren espazioak euskaraz betetzeko eta eragiteko xedez aritu gara urte hauetan, komunitatea sustatuz eta tresna, baliabide zein proiektu berritzaileak eraikiz eta partekatuz. Proiektu propioak sortu ditugu (Ziurtagiria, Enpresarean, Lansarean lan-ataria, Euskaragileak, ‘Elkarrengandik Ikasiz’ solasaldiak), elkarlanean aritzen gara (Euspot Lehiaketa, Lazarraga Sariak, Beterri-Saretuz, etab.) eta erakunde ezberdinei zerbitzua eskaintzen diegu (Arabako Enpresen Foroa, Euskara Langai, etab.). Ziurtagiri bat baino askoz gehiago izatera iritsi gara, eta aurrera begira ere eremu ezberdinetan eragiten jarraituko dugu».
Gutiérrezen arabera, «lehen Bai Euskarari Ziurtagiriak banatu ziren egun hartatik, 22 urte geroago ere, beharrezkoak izango ditugu eragile, enpresa, erakunde eta norbanako ezberdinen arteko elkarlana eta komunitate osoaren indarra, euskaraz egiten eta eragiten jarrai dezagun». Horrekin batera, «erronkei aurre egiteko jauzi berriak behar ditugu, pentsatzeko, lankidetzak bideratzeko, egiteko eta eragiteko molde ausartagoak».