Doneztebe Futbol Taldearen Eguna larunbat honetan, ekainaren 18an, ospatuko dute, egitarau zabalarekin.
Larunbat goizean futbolak izanen du leku berezia. 10:00etan txikien partidak jokatuko dituzte (futbol eskola, aurrebenjaminak eta benjaminak). 10:30ean infantil eta kadeteen partidak jokatuko dituzte eta 11:30ean triangularra herriko hiru taldeen artean.
Arratsaldean, 17:00etan mus txapelketa jokatuko dute eta ordu lehenagotik izanen da apuntatzeko aukera txoznan, 5 euro ordainduta. 18:30ean merienda eskainiko zaie alebin, benjamin, aurrebenjamin eta futbol eskolakoei.
Larunbatek gau giroan murgiltzeko, 20:00etan triki-poteoa eta 21:30ean afaria izanen dute Santa Luzia plazan. Menua 35 euro ordaindu beharko da (magra, patea, fritoak, entsalada mistoa, arraina saltsan, entrekota, kafea eta kopa edo kubata). 01:00etan hasita gaupasa izanen da Gabezin taldearekin.
Jaime Seinen agurra
Kirol arloan, futbol talde nagusiak iaz lortu zuen Maila Autonomikoa galdu du aurten, eta berriz ere Preferenten ariko da 2022-23 denboraldian. Gainera, ekainaren 4an hondarreko partida jokatu zuen Jaime Sein kapitainak ere. Talde seniorra sortu zenetik aritu da Donezteben, eta taldearen lorpen guztien partaide izan da: kopa, igoerak, zelaiaren inaugurazioa… Ruben Alvarez entrenatzaileak ere azken aldiz entrenatu zuen taldea, Doneztebe futbol taldean 2019-2020 denboraldian hasita. Biei eskerrak eman dizkiete Doneztebe futbol taldearen izenean.