Parrillarekin «lan asko» egiten dute; «arraina, txuletak… axuria baratxuriarekin Malerrekako txilindron erara eta baserriko oilaskoa dira gehien eskatzen dizkiguten platerak». Jatetxeaz gain, bost gela dituzte, denetara hamar lagunentzako tokiarekin, «gela bakoitza bere komun eta telebistarekin».
Bisitariei inguruko informazioa ematen diete, zer ikusi, nora joan… «Aste Santuan jende asko etortzen da eta hortik aurrera udazkenera arte betea egoten da beti. Maiatzean Europako jende asko etortzen da motoan, Kataluniatik Pirinioetara sartu eta hemendik buelta emanez. Udan leku guztietako jendea etortzen da; Euskal Herria, Katalunia, Madril, Andaluzia… baita urrunagotik ere; Alemania, Estonia, Estatu Batuak, Kanada, Hong Kong… uda partean mugimendu handia izaten da».