E•rremonte enpresak Euskal Jai Berri Fundazioaren laguntzarekin antolatutako binakako erremonte txapelketaren finala gaur jokatuko dute Iruñeko Labrit pilotalekuan Xanti Uterga doneztebarrak eta Ionek, Aldabe eta Azpirozen kontra.
Ortziralean 19:00etan hasiko da jaialdia, berriki hildako Pablo Lekunberri erremontista gogoratuz. Ondotik, jaialdiko lehen partidan, Matxin III.a eta Otano, Josetxo Ezkurra II.a doneztebarren eta Agirrezabalaren kontra ariko dira. Segidan, 20:00etan jokatuko dute final handia Utergak eta Ionek, Aldabe eta Azpirozen kontra. Navarra TV telebista kateak zuzenean emanen du finala. Joan den ortziralean Elizondon jokatutako finalerdietako ligaxkako partidan Uterga eta Ion erraz nagusitu ziren, baina finala bertze partida bat izanen da, laburragoa den bertze pilotaleku batean eta bertze material batekin.
Sarrera 10 euro kostako da eta bildutakoa, oso-osorik, ADANO elkartearentzat izanen da.
Errenbantxa Hendaian
Gaurko finalak errebantxa ere izanen du Hendaian, atzo Hendaiako udalak aurkeztu zuenez. Erremonte Fundazioak antolatuko du jaialdia, Hendaiako udalarekin duen urteko hitzarmenaren bitartez, E•remonte enpresaren eta Endaiarrak pilota elkartearen laguntzarekin. Jaialdia Hendaiako Marin ospitalean ingresatuak daudenak laguntzen dituen Les Deux Jumeaux elkartearen alde izanen da.