Aziendak, Malerrekako eskulangileak eta baserrietako jan-edariak eta komertzioak karrikara atera dira Doneztebeko ferietan

Duela bi urtera arte karrikak betetzen zituzten saltzailerik gabe, baina eguraldi eguzkitsu bikaina lagun zutela, hainbat azienda plazaratu dituzte gaur Doneztebeko feria egunean: behiak, aratzeak, behorrak eta ahariak izan dira Merkatuko Plazan. Horien arrimuan, Malerrekako eskulangileen lanak eta baserrietako eta bertako janari eta edariak izan dira saltzeko, baita Doneztebeko hainbat komertzioetako produktuak ere. Ardi-mozte erakustaldia ere egin dute. Arratsaldeko herri kirol jaialdiarekin borobilduko dute feria eguna.

Herri kirolak arratsaldean

Feria egunean ohitura den herri kirol saioak ere ez du hutsik eginen. Euskal Herriko hirugarren mailako aizkora txapelketaren finala jokatuko dute 18:00etan Ezkurra pilotalekuan. Patxi Mindegia zubietarra izanen da eskualdeko ordezkari bakarra eta berekin batera aizkolari hauek parte hartuko dute: Jokin Urretabizkaia (Gipuzkoa); Julen Gabirondo (Gipuzkoa), Xuban Kañamares (Nafarroa), Andoni Iruretagoiena (Gipuzkoa) eta Suharri Rodriguez (Gipuzkoa). Honako lan hau egin behar dute: hiru kanaerdiko eta bi 60 ontzako enborrak.

Jaialdian Nafarroako lehen mailako aizkora jaitsieraren kanporaketa ere jokatu beharko dute Oier Kañamaresek eta Ibai Resanok. Bortz enbor moztu beharko dituzte: bi kanaerdiko, bi  60 ontzako eta oinbiko bat. Jaialdia borobiltzeko Nafarroako gizonezkoen arpana txapelketa ere jokatuko da. Etzanda jarritako kanaerdiko enborrari 14 korte eman beharko dizkiote eta zutik jarritakoari lau. Josetxo Barberena eta Iñaki Barberena; Adrian Berruezo eta Alberto Oteiza eta Lur Gil eta Iker Goldarazena ariko dira.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun