Otxandorena eta Azpiroz ariko dira Uterga eta Otanoren kontra Nafarroako erremonte txapelketaren finalean

Otxandorena eta Azpirozek ortziralean lortu zuten larunbaterako finalerako txartela, Ezkurra II.ari eta Barricarti irabazita.

Ortziraleko partida erabakigarrian, 35-23 irabazi zieten Ezkurra II.a eta Barricarti Tafallan.

Nafarroako erremonte txapelketako finalerdietako ligaxkako azken jardunaldia jokatu da asteburuan Tafallan. Ortziraleko partida erabakigarrian, Eloi Otxandorena doneztebarrak eta Azpirozek 35-23 irabazi zieten Josetxo Ezkurra II.ari eta Barricarti. Horrela, irabazleek Xanti Utergaren eta Otanoren kontra jokatuko dute finala larunbatean Zubirin.

Ortziraleko partida azken emaitzak erakusten duena baino gogorragoa izan zen. Hemezortzinako berdinketaren ondotik, ordea, kolore urdina hartu zuen norgehiagokak, Otxandorenak eta Azpirozek bikote sendoa direla erakutsi baitzuten. 2-12ko partzialarekin 20-30 irabazten jarri ziren, Ezkurra II.ak arriskuak hartu zituen baina arrakasta handirik gabe eta urdinek finalerako txartela lortu zuten, 35-23 irabazita. Jaialdiko lehen partidan, Zeberio II.ak eta Otanok 35-33 irabazi zieten Matxin III.a eta Aimar Saldias oiztarrari.

Larunbatean Uterga eta Otano garaile

Larunbateko finalerdietako partidan, Xanti Utergak eta Otanok 35-23 irabazi zieten Aldabek eta Aimar Saldias oiztarrari. Gisa honetara, finalerdietako ligaxkako partida guztiak irabazi dituzte Utergak eta Otanok eta alerik ere ez Aldabek eta Saldiasek, final laurdenetako ligaxkan onenak izan arren.

Jaialdiko lehen partidan, Matxin III.ak eta Azpirozek 35-22 irabazi zieten Otxandorena eta Ioni.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun