Nafarroako erremonte txapelketako lehen faseko azken jardunaldia Donezteben jokatuko dute ortziralean

Ttipi-Ttapa 2021ko uzt. 28a, 14:00
Josetxo Ezkurrak (eskuinean) eta Barricartek beraien esku dute finalerdietarako txartela lortzea ortziralean Donezteben.

Herriko hiru aurrelari lehian ikusteko aukera izanen da 19:00etatik aitzinera Ezkurra pilotalekuan

Nafarroako XVI. erremonte txapelketako lehen fasea Donezteben akituko da uztailaren 30ean. Ortziralean 19:00etan Ezkurra pilotalekuan jokatuko den txapelketako jardunaldian herriko hiru aurrelari ikusteko aukera izanen dute. Xanti Utergarekin Otano ariko da, Josetxo Ezkurra II.arekin Barricart eta Eloi Otxandorenarekin Azpiroz.

Finalerdietan sartuko diren lau bikoteetatik hiru erabakiak daude eta ortziralean erabakiko da laugarrena. Laugarren txartel hori Ezkurra II.a-Barricart eta Zeberio II.a-Ion bikoteen artean dago jokoan.

 

Larunbatean ere erremonte jaialdia

Ortziraleko txapelketako jardunaldiaren ondotik, uztailaren 31n, larunbatean 18:30ean hasita erremonte jaialdia izanen dute Doneztebeko Ezkurra pilotalekuan. Lehen partidan, Matxin III.a eta Ion, Aimar Jabalera doneztebarraren eta Aimar Saldias oiztarraren kontra ariko dira. Bigarren partidan, bezperako txapelketako jardunaldian bi lehenbiziko postuetan sailkatutako bikoteak ariko dira elkarren kontra. Hirugarren partidan Errekako erremonte eskolako pilotariak ariko dira.

Bi jaialdietan 5 euroko sarrera kobratuko dute, oso-osorik ADANO elkartearen alde.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun