Doneztebe eta Sunbilla artean egitekoa zuten Ipar Martxa Maratoia bertan behera utzi dute

Ekainaren 19an ez da ipar martxa probarik eginen Doneztebe eta Sunbilla artean.

Gaur gaurkoz 27 kirolarik bakarrik emana zuten izena eta «horrela proba egitea ez da bideragarria» adierazi dute antolatzaileek

Joan den urteko arrakasta errepikatzeko gogoz, aurten ere ipar martxa maratoia antolatua zuten Corriendoporelmundo enpresak eta Ttuku Ttuku ipar martxa taldeak, Doneztebeko Erreka kirol elkartearekin eta Doneztebeko Udalarekin elkarlanean. Ekainaren 19an egitekoa zuten bigarren hitzordu hori, Doneztebe eta Sunbilla lotzen dituen bide berdean barrena. Baina antolatzaileek proba bertan behera uztea erabaki dute.

«Penaz eta tristuraz» hartutako erabakia izan dela aipatu dute ohar batean, baina «gaur gaurkoz 27 kirolari bertzerik ez dute izena emana, eta kopuru hori ez da aski proba bideragarria izateko. Eta ezin dezakegu gehiago esperatu, txip bidezko kronometrajeak epea estutzen dituelako».

Dagoeneko izena eman dutenei dirua itzuliko diete eta antolatzaileek barkamenak eskatu dituzte egoera honek ekar ditzakeen eragozpenengatik. «Guretzat ere lan-ordu eta diru galera da, baina batez ere kirolariak ez erakarri izana atsekabetzen gaitu», diote oharrean.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun