Nafarroako XVI. Erremonte txapelketako laugarren jardunaldia jokatu zuten ekainaren 4an, ortziralean Azkoiengo pilotalekuan. Aldabe eta Aimar Saldias oiztarra galtzen hasi ziren, 20-15, Xanti Uterga doneztebarra eta Otanoren kontra. Baina gero garbi ireki zieten Zeberio II.a eta Ioni (20-8). Garaipen argi hori erabakigarria izan zen, azken partidan Zeberio II.ak eta Ionek 20-19 irabazi baitzieten Uterga eta Otanori. Honela, partida bana irabazita, baina tanto aldearengatik Azkoiengo jardunaldian garaile suertatu ziren Aldabe eta Saldias.
Larunbatean ere jaialdia Azkoienen
Txapelketako jardunaldiaren ondotik, larunbatean bertze jaialdi bat ere izan zuten Azkoienen. Lehenbiziko partidan, Aimar Jabalera doneztebarrak eta Ionek 25-28 irabazi zieten Erburu eta Azpirozi. Ondotik, partida nagusian, Azkoiengo erremonte profesionaleko torneoa jokatu zuten bezperako jaialdian lehen eta bigarren postua lortu zuten bikoteek. Aldabe eta Saldiasek 35-33 irabazi zieten Uterga eta Otanori.