Erremonte Profesionaleko Txapelketa-2021ko Caixabank Sari nagusiko aurkezpena egin zuten asteartean Iruñean. Sei bikote ariko dira eta final laurdenetako ligaxkako lehen partida martxoaren 20an jokatuko dute Antsoaingo Iraki kiroldegiko pilotalekuan, larunbatean 18:00etan hasita Josetxo Ezkurra doneztebarrak eta Aimar Saldias oiztarrak, Matxin III. eta Garcesen kontra.
Martxoaren 27an, Atarrabian, Zeberio II.a eta Otano, Aldabe eta Azpirozen kontra ariko dira eta martxoaren 28an, Uharten, Xanti Uterga doneztebarra eta Barricart, Eloy Otxandorena doneztebarraren eta Ionen kontra.
Hiru partida hauek irabazten dituzten bikoteek hiruko finalerdia jokatuko dute apirilaren 3an Olatzen eta bi onenak apirilaren 9an Iruñeko Labrit pilotalekuan jokatuko den finalean izanen dira. Jaialdi guztietan 5 euroko sarrera kobratuko da, oso-osorik Adano elkartera bideratuko dena.