Malerrekako Euskara Zerbitzuak, Doneztebeko liburutegi publikoarekin eta Katubirekin lankidetzan, Kultur Zarea ekimena abiatu du. Egitasmo horren helburua euskal kulturari garrantzia eta ikusgarritasuna ematea da eta horretarako ikus-entzunezkoak zabalduko dituzte Bortzirietako eta Malerrekako Euskara Zerbitzuen Youtube kanalaren bidez.
Azaldu dutenez, aurten guztira bortz bideo landuko dituzte eta horien bidez Doneztebeko liburutegi publikoko zerbitzuen nondik norakoak azalduko dituzte. Horrez gain, bideoetan haur, gazte eta helduendako aholkuak emanen dituzte.
Lehenbiziko ikus-entzunezkoa bihar
Zareko lehenbiziko kultur aletxoa bihar, ortsailaren 25ean, pantailaratuko dute 09:00etan. Marga Erdozainek, liburutegiko langileak, ikus-entzunezkoak maileguan hartzeko prozesua eta EFILM plataformaren bidez streaming bidez ikusteko azalpenak emanen ditu.