Arkupeak elkarteko mendizaleak Beintza-Labaien inguruan ibili dira urteko lehen irteeran

Hasiera batean Hondarribira joatekoak baziren ere, herrialde arteko mugak igaro ezin direnez, Beintza-Labaien inguruan egin zuten asteartean Arkupeak elkarteko mendizaleek urteko lehen mendi irteera. 26 mendizale bildu ziren eta Bonozorrotz eta Sorotxipi (1.070 metro) mendietara igo eta bortz orduko bidea egin ondotik, berriz ere Beintza-Labaien ingurura bueltatu ziren. Gehiena kendu bada ere, bazter batzuk oraindik elurrarekin zurituak topatu zituzten.

Urteko helmugak zehaztuak

Osasun egoerak agindutako arauak errespetatuz ahalik eta irteera gehien antolatzeko asmoa dute Arkupeak elkarteko mendizaleek, nahiz eta jakin data hauek alda daitezkeela. Urtarrileko Labaiengo irteeraren ondotik, otsailean Legatera (Baztan), martxoan Berastegira, apirilean Leitzara, maiatzean Arizkunera, ekainean Urdazubira, uztailean Uharte-Arakilera, abuztuan Hernio mendira (Tolosaldea), irailean Kartxela mendira (Pirinioak), urrian Pagoeta parkera (Hernio mendilerroan), azaroan Irunera eta abenduan Etxalarrera joateko asmoa dute.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun