Eraikin berriak 1.214,70 m2-ko azalera eraikia du eta 6 unitaterako edukiera. Gainera, berariazko gelak, jantokia, irakaskuntza-bulegoak, komunak eta bertzelako gela osagarriak ditu. Eraikinaren proiektua Díaz Arquitectos enpresak egin du eta eraginkortasun energetikoari dagokionez, «kontsumo ia nuluko eraikinen» kalifikazioa omen du.
Eraikuntza lanak Excavaciones Osés SL enpresari esleitu zion Hezkuntza Departamentuak 2.207.899,34 euroren truke eta, gainerako gastu guztiak sartu ondotik, inbertsioaren guztizko prezioa 2.685.774,34 eurokoa da. Obrak 2019ko azaroaren 4an hasi ziren, eta 7 hilabeteko epea zuten akitzeko; beraz, 2020ko ekainaren 5erako amaituta egon behar zuten. Hala ere, lurrak mugitzeko lanak hasi zirenean, ondoko mendi-hegala egonkortu behar izan zuten, segurtasun-arazoak zeudelako lanak egiteko, eta horrek akabera-epea atzeratzea ekarri du. Oraindik eraikina barnetik egokitzeko eta hornitzeko lanean ari dira Hezkuntza Departamentukoak eta, okerrik ez bada, oporren ondotik dena prest egonen da eskola berrian hasteko.
Kontsumo ia nuluko eraikinak: nolakoak dira? zer berezitasun dute?
Energia-kontsumo ia nuluko eraikinak, termino garbietan, kontsumitzen duten energia (klimatizazioan eta ur korronte sanitarioetan) zerotik hurbil egoteko diseinatutako eraikinak dira. Hau da, eraikin hauek, energia berriztagarriak erabiliz eta bertze energia-iturri batzuk optimizatuz, denboraldi batean, generalean urte bateko epean, kontsumitzen duten energiaren haina ekoitzi behar dute euren kabuz.