Joan den larunbatean, abuztuaren 22an, Kutxabank Torneoko finalerdietako ligaxka abiatu zuten Barrenetxea IV.ak eta Juaneneak. Saldiasko aurrelariak ikuskizun ederra eskaini zuen eta, horri esker, garaipena lortu zuen. Horrekin, txapelketako azken sei partidak irabazi ditu Juaneneak. Azkenekoan, 21-30 gailendu zitzaion Barrenetxea IV.ari.
Partida guztian aurretik ibili zen saldiastarra, hasieran izandako 1-1 berdinketan salbu. Hortik aurrera, Saldiaskoak gidatu zuen partida. Markagailuak 6-7ra ailegatu arte, norgehiagoka handia izan zen arren, hortik aurrera 7-14 aurreratu zen Juanenea. Hamar tantoko aldea lortu zuenean (8-18) Barrenetxeak ordura arteko jokoa iraultzeko ahalegina egin zuen, lau tantora kokatuz (14-18). Dena den, ez zuen buelta ematerik izan.
Partida hori irabazita, Juaneneak lau puntu eskuratu zituen, eta hernaniar atzelaria batere gabe utzi zuen. Finalerdietako ligaxkako lehenbiziko jardunaldiak zapore gozoa izan du saldiastarrarentzat.