COVID-19: Elkarrizketak

«Denboraldia hasi berritan denda lepo izan eta ateak itxi behar izateak nahigabe handia eragiten dit»

Ttipi-Ttapa 2020ko mar. 24a, 08:00
Maite Zozaia egoera «zaila» bizitzen ari da.

Maite ZOZAIA MARIEZKURRENA - Maite Moda

Egoera «zaila» bizitzen ari da Maite Zozaia. Koronabirusak «denboraldi hasieran» harrapatu du: «denda udaberriko arropekin beteta dut eta hori ezin dugu atera».

Momentu «txarren txarrenean» itxi behar izan ditu dendako ateak: «beherapenetan izan balitz ez litzateke gauza bera izanen, erositakoa ordaindua izanen nukeelako. Orain, berriz, dena berria da eta hor milaka euro daude, atera ezinik…».

Hori gutti balitz, «aseguruak, autonomoen kuota, lokalaren alokairua eta bertzelako gastuak» ordaindu behar dira. Langile bat ere «ordu batzuz» ere badu, eta horri ere «begiratu beharra» nabarmendu du: «ez dakit zein den soluzioa…».

«Laguntzarik izatekotan gutti» izanen dela uste du: «gastuak egunero ditugu, ez dira eteten». Okerrena  «noiz arte iraunen duen ezin jakitea» da: «denboraldia aitzinera doa eta horri buelta ematea ezinezkoa izanen den arren ea lehenbailehen pasatzen den».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun