Martxoaren 7an ospatu zituzten eskualdeko hondarreko inauteriak, Ezkurran. Larunbat goizean mozorroak jantzi eta frontoian bildu ziren eguraldi txarrari aurre egiteko. Hortik abiatuta, etxez etxe ibili ziren Oihana eta Irati trikitilariekin. Bazkalondoan gazteak baserrietan zeuden bitartean 3 eta 12 urte bitarteko gaztetxoak Berdintasunari kolorez kanta ipuin-kontaketa eta tailerra izan zuten.
Ludotekan txokolate beroa hartuta, 'Malerrekan errespetuzko harremanak' eskatzen dituen lona zintzilikatu zuten. Gauean 50 lagun inguruk Barranka jatetxean afaldu zuten, Aitor Mendiluze eta Iker Zubeldiaren bertsoez gozatuz. Bukatzeko, trikitilarien txanda izan zen. Askok, dantza eta kanta artean, biharamuneraino luzatu zuten eguna. Larunbat paregabea izan zen herritar eta bisitarientzat.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.