Erremonteko UTS Komunikazioa Buruz Buruko Master Txapelketa ortzegunean hasiko da jokatzen Galarretan. Banakako txapelketa izaten da eta hamargarren edizioa beteko du aurten. 2020koan sei erremontistak hartuko dute parte, pasa den urtean bezala, eta bortz partidu jokatuko dira guztira. Eskailera formatua izanen du eta Endika izanen da eskualdeko ordezkari bakarra, Ezkurra II.a lesioatik atera berria baitago.
Ortzeguneko lehenengo partidan Azpiroz eta Ansa II.a ariko dira elkarren aurka. Bigarren partidan, larunbatean, Goikoetxea V.a eta Endika lehiatuko dira bata bertzearen kontra. Lehenengo partidaren irabazleak Barrenetxea izanen du aurrez aurre otsailaren 1ean eta bigarren partiduko irabazleak Urriza hartuko du egun berean. Finala, otsailaren 8an jokatuko da finalerdien irabazleen artean.
Koteto Ezkurra haundiak irabazi zituen lehendabiziko bi edizioak 2011n eta 2012an. Ondoren, Urrizaren bi garaipen etorri ziren (2013 eta 2014), Utergak hartu zuen erreleboa 2015ean eta 2016an bertze bi garaipenekin eta azken hiru urteetan berriz ere Urrizak menderatu ditu aurkariak.
Pasa den urtean bezala, UTS-Komunikazioa da babesle eta bere izena du txapelketak. Aurkezpenean Unai Lizarribar egon zen UTS-ren ordezkatzen, Oriamendi2010eko Xabi Gonzalez eta Barrenetxea eta Goikoetxea erremontistak. Barrenetxea Banakakoaren txapelduna eta Goikoetxea Mastersean debutaria.