Nafarroaren eta Euskararen Eguneko kontzertua eskainiko du Mendi abesbatzak abenduaren 3an Donezteben

Mendi abesbatza 'Lau teilatu' kantua prestatzen ari da abenduaren 3ko emanaldirako.

EITB taldeak deitu duen haurren minbiziaren aurkako kanpainarekin bat eginez, ‘Lau teilatu’ kantua ere abestu eta grabatuko dute

Datorren abenduaren 3an, Nafarroako Egunaren  harira, aurten bere 25. Urteurrena ospatzen duen Doneztebeko Mendi Abesbatzak kontzertua eskainiko du herrian, Nafarroako Gobernuaren gonbidapenari jarraiki.  Asteartean 13:00etan hasiko da emanaldia San Pedro elizan.

Emanaldiaren muina bi gaien ingurukoa izanen da: Nafarroaren Eguna berarena, eta baita egun berean ospatzen den Euskararen Egunarena, hain zuzen ere.  Hori dela eta, euskal kanta ezagunak eta konpositore nafarren lanek osatuko dute kasik programa osoa. Hasiera Nafarroako Ereserkiak emanen dio, eta ondotik Federico Moreno-Torroba Larregla zein Jesús Sorozabal Maisu nafarren obrak, egunari ezinhobe lotzen zaion Aita Donostiaren hainbat konposizio zein euskal kantutegiko hainbat kanta ezagun adituko dira. Baina horiez gain, emanaldiak berezitaun nabarmen bat izanen du: EITB taldeak deitu duen haurren minbiziaren aurkako kanpainarekin bat egin asmoz, Mendiko kideak Itoiz taldearen Lau Teilatu kantua prestatzen ari dira buru belarri, eta egun horrexetan estrenatu eta grabatu eginen dute EITBko plataformara bidaltzeko. Entzuleen parte hartzea ere sustatuko dute horretarako.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun