Pronostikoak bete eta, 23 urte bertzerik ez dituela, nagusitasunez irabazi du Nafarroako bosgarren txapela Iker Vicente otsagabiarrak. Hasieratik bukaerara aitzinetik izan zen eta 32 minutu eta 16 segundo behar izan zituen lau kana-erdiko, lau 60 ontzako eta bi oinbiko mozteko. Minutu eta 41 segundoko aldea atera zion bigarren izan zen Lezaungo Juan Jose Lopezi (33.57) eta bi minutu baino gehiagokoa podioa osatu zuen Jon Rekondo leitzarrari (34.18). Finaleko azken postua saihesteko izan zen borrokarik handiena eta azkenean, laugarren postua Ruben Saralegi leitzarrak lortu zuen (38.55). Bederatzi segundoko aldea atera zion Zigako Joxean Etxeberriari (39.04). Argazkiak: Ibon Errazu Uria
Aizkolarien txapelketaz gain, Ezkurra pilotalekuan gainezka bete zuten zaleek Mikel Lopetegi Urra harrijasotzailearen erakustaldia ikusteko aukera ere izan zuten. Sari banaketan, Xanti Uterga Doneztebeko alkatea eta Jon Telletxea, Malerrekako Mankomunitateko ordezkaria, Beintza-Labaiengo alkatea eta aizkolaria izan ziren.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.