Azarorako antzerkia, musika, zinema, aurkezpenak eta hitzaldiak prest dituzte Donezteben

Halloween egunarekin lotutako antzerki emanaldia eskainiko du Firin-Farandula taldeak larunbat arratsaldean.

Azaroaren 2an Halloweenen inguruko antzerki-emanaldia eskainiko du Firin-Farandula taldeak 

Antzerki- eta zinema-emanaldi, kontzertu, aurkezpen, hitzaldi... azaroan hamaika ekitaldi izanen dituzte Donezteben. Hasteko, azaroaren 2an, larunbatean Halloween aitzakiatzat hartuz Malerrekako Firin-Farandula antzerki-taldearen emanaldia izanen dute, larunbatean 18:00etam zineman. Adin guztietako ikusleei eta bereziki gaztetxoei bideraturiko emanaldia izanen da eta ‘El museo de los Warren’ eta ‘Thriller y la brujita presumida’ antzezlanak eskainiko dituzte. Ekitaldi horren bidez zabalduko da azaroko agenda bete-betea.

Kontzertua, ipuinen txokoa eta zinema

Azaroaren 3an, igandean,  Vocal Group Era abesbatza letoniarraren kontzertua izanen dute, elizan, 19:00etan. Urriaren 8an abiatutako ipuinen txokoak ere azaroan segida izanen du. Hilaren 5ean, 12an, 19an eta 26an, 11:00etan liburutegian bilduko dira, Haizea Loiraren eskutik. Tartean, hilaren 10ean eta 24an guraso elkarteak eta Gazte Burrunbak antolatutako zinema emanaldiak izanen dituzte.

 

Margaret Atwood idazleari buruzko hitzaldia

Azaroaren 8an, ortziralean, Margaret Atwood idazleari buruz solas egiteko bilduko dira liburutegian. Josune Muñoz euskal filologo eta literatura feministaren alorreko kritikariak eskainiko du hitzaldia, 18:00etatik 21:00etara.

 

Udazken feria

Ohiko hitzorduek ez dute hutsik eginen. Azaroaren 15eko udazken feriaren bueltan, aizkora apustua izanen dute eta, aurten ere, lila puntua paratuko dute. Biharamunean, azaroaren 16an, Niretik emanaldia izanen dute. Andoni Egañak bere bizitzari lotutako  bertsoak kantatuko ditu, Jon Ostolaza soinujolearen laguntzaz.

 

Euskaraldiaren aurkezpena

Ekitaldiek ez dute etenik izanen. Azaroaren 21ean, ortzegunean, Euskaraldiaren bigarren edizioa aurkeztuko dute. 19:00etan bilduko dira Mankomunitatearen egoitzan.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun