Mendi abesbatzak 25. urteurreneko ikasturte berezia izanen du aurtengoa

Ttipi-Ttapa 2019ko ira. 20a, 07:30
Mendi Abesbatza, irailaren 7an Cascanten eskaini zuen emanaldian.

Irailaren 21ean Xabierko Auditorian kantatuko dute Errioxako Orkestrarekin eta Burlatako San Andres abesbatzarekin

Doneztebeko Mendi Abesbatzako kideek aurtengoan ere goiz eta indartsu hasi dute ikasturtea. Uztailean Gorliz aldean ibili ziren XXV. Habanera eta Euskal Polifonia Jaialdian parte hartzen eta irailaren 7an, Cascantera joan ziren bertan antolatu zuten Abesbatzen Jaialdian abestera.

Irailaren 21an, larunbatean, errepertorioa erabat aldatu eginen dute, Xabierko Auditorioan Errioxako Orkestrarekin eta Burlatako San Andrés Abesbatzarekin batera Buenaventura Iñiguez zangotzarraren 8 Ahotsetarako Meza eta Aurelio Sagasetaren Agur Maria eskaintzeko, Nafarroako Abesbatzen Elkarteak sustaturiko emanaldian.  Guztiak Jesús Echeverría Maisuaren zuzendaritzapean ariko dira.

Urri alderako ere emanaldi berezia prestatzen ari da Abesbatza, honakoan Doneztebera etorriz. Xehetasunak aitzinerago zabalduko dituzte.

Lanez gainezko dator ikasturtea, baina ospakizunetarako tartea ere hartuko dute abesbatzako kideek, izan ere, aurtengoan Mendi Abesbatzaren 25. Urteurrena ospatuko baitute. Horretarako ekintza ugari prestatzen ari dira, hurbiltzen diren heinean azalduko dituztelarik.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun