EMURA talde feministaren idatziaren arabera, «normaltasunaren izenean, marra gorria behin baino gehiagotan zeharkatu dute gure eskualdean, eta erasotzaileez gain, konplizeen rola ere azpimarratu nahiko genuke. Guztion eskuetan dago halako egoeretan erasotzaileari aurre egitea eta salatzea».
EMURAren ustez, «gure egunerokoan ekintza matxistek duten presentzia eta indarra ez da kasualitate hutsa; ez dira kasu isolatuak eta ez da pertsona zehatz batzuen kontua soilik. Askotan jarrera batzuk ohikotzat eta normaltzat jotzen ditugun arren, emakumeon intimitate askatasuna behin eta berriz urratzen da, emakumearen erosotasuna eta duintasuna hautsiz».
Ozenki eta indar handiz salatu nahi dituzte erasook, eta «emakume guztioi babesa, elkartasuna, laguntza eta beharrezko informazioa eskaini». Horretarako emurataldefeminista@gmail.com helbidera idatz daiteke, «baita edozein herritako kale eta txokotan ere topatuko gaituzue».
«Horrelako ekintzek ez dute lekurik gure kale eta tabernetan! Erasoen aurrean, autodefentsa feminista! Jai parekide eta aske batzuen alde! Ez izan konplize, inplikatu!», dio EMURAk idatzia akitzeko.