Punta-puntako bortz aizkolari bikotek parte hartuko dute hamarna kanaerdiko eta seina 60 ontzako mozteko proban: Aitzol Atutxa eta Joseba Otaegi; Iker Vicente eta Ruben Saralegi, Mikel Larrañaga eta Eneko Otaño, Ugaitz Mugertza eta Julen Alberdi Txikia IV.a eta Xabier Orbegozo Arria V.a eta Jon Rekondo leitzarra. Bikote bakoitzak hamaseina enbor moztu beharko ditu, hamar kanaerdiko eta sei 60 ontzako.
Jaialdi berean, aizkolari beteranoak ere ariko dira lehian: Donato Larretxea (Arantza) eta Miel Mindegia (Ezkurra) Angel Arrospide eta Anjel Mari Peñagarikanoren aurka ariko dira. Bikote bakoitzak lau kanaerdiko eta sei 45 ontzako ebaki beharko ditu. Denen artean Euskal Herriko hogei txapel dituzte.
Aizkoralarien saioaz gain, harri-altxatzen ere ariko dira kirolariak. Aimar Irigoien eta Mikel Lopetegi Urra lehian ariko dira: 125 kiloko kopa eta errektangularrari, 113 kiloko kubikoari eta 100 kiloko bolari hamarna jasoaldi segidan eman beharko dizkiote.
Txingekin, berriz, Ousmane Drame ariko da. 100 kiloko txingekin Santxok egindako marka hobetzen saiatuko da.