Hamargarren urteurrena ospatzen hasi da Elgorriagako Bainuetxea

Ttipi-Ttapa 2019ko uzt. 2a, 19:00
Langileak eta erabiltzaileak bildu ziren Elgorriagako Bainuetxearen hamargarren urteurreneko lehen ekitaldian. Argazkia: Foto Zaldua

Langileekin lehen elkarretaratzea egin zuten ekainaren 29an, baina ekitaldi nagusia urrian eginen dute

Hamargarren urteurrena ospatzen ari da Elgorriagako Bainuetxea. 2009ko urrian ireki zuten eta lehen ospakizuna ekainaren 29an egin zuten, lehengo eta oraingo langileak bilduz. Proiektua bultzatu eta sustatu zuen garai hartako alkateari, Jose Migel Galarregiri ere oroigarri bat eman zioten. Urte osoan egin nahi dituzte ospakizunak, baina ekitaldi nagusia urrian eginen dute.

Hamar urteotan 80.000 bat erabiltzaile pasatu dira Elgorriagako bainuetxetik. Horietatik erditsuak gaua eman du instalazioetan, eta bertze erdiak, bainurako putzuak eta jatetxea erabili dituzte.

Bere garaian 10,2 milioi euroko inbertsioa egin zen garai bateko balnearioa zegoen lekuan berria egiteko. 6.000 metro koadroko eremuan, denera 75 logela dituzten hiru eraikin egin zituzten, jatetxea eta putzu-eremua. Handienak 400 metro koadro hartzen ditu. Uraren ezaugarriei dagokienez, litro bakoitzeko 310 gramo gatz ditu, «Itsaso Hilean baino gehiago».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun