Mugimendu bikoitza izanen dute Zubietan igande honetan. Izan ere, aurten Bestaberri eguna eta San Juan bezpera egun berean ospatuko dituzte.
Bestaberri egunaren harira, arratsaldean meza izanen dute eta ondotik gazta lehiaketan bilduko dira. Irabazleak, Udalaren eskutik, Herriko Ostatuan bi lagunendako afaria jasoko du saritzat. Segidan, merienda izanen dute eta 18:30 aldera dantzaldian bilduko dira. Migel Angelek girotuko ditu bazterrak.
Horrez gain, azken urteetako ohiturari eutsiz, herriko gaztetxo eta gurasoek plazan afalduko dute. Afari autogestionatua izanen da. Mahaiaren bueltan lasai afaldu ondotik, eguna borobiltzeko su ttiki, koxkor zein handiak piztuko dituzte eta herritarrak saltoka ibiliko dira, urteko desioak eskatuz.