Segurolak eta Endikak ortzegunean lortu zuten txartela eta Ezkurra II.ak eta Garcesek bertze horrenbertze egin zuten larunbatean. Gaztañagako Urriza eta Zaldua zuten arerio eta 36-40 irabaztea lortu zuten. Aritz Garces izan zen partidako onena, Urrizaren erasoei aurre egiteaz gain, erasora ere jo zuen. Partida berdindua joan zen bukaerara arte. Urriza eta Zaldua 29-28 eta 31-30 aitzinetik izan ziren azken aldiz. 33na, 34na eta 35na berdindu ondotik, Ezkurra II.ak pilotakada bikainak eman eta 1-4ko partzialarekin tanto bakarraren faltan gelditu ziren urdinak. Azken tanto hori, nola ez, Garcesek egin zuen.
Joan den urtean Urrizarekin aritu zen finalean Garces eta aurten, Ezkurra II.arekin ariko da. Aitzinean, aurtengo txapelketan partidarik galdu ez duten Segurola eta Endika izanen dituzte.