Ortzegunetik larunbatera ez du atsedenik hartzen: «Herriko Ostatuan afaria eginez hasten ditugu; ortziralean herriko gazte guztiak baserriz baserri ibiltzen gara, bazkaldu, mozorrotu eta bestan bukatzen dugu; larunbatean, berriz, karrozen desfilea egiten dugu».
Orga «ikusgarriak»
Momentu guztiak «bereziak» badira ere, «politena» hondarreko egunean inauteriak borobiltzeko egiten duten buelta da doneztebar gaztearentzat: «lan handia egiten dugu igandeko mozorroa eta karroa prestatzen, eta egindakoa jendaurrean erakustea ederra da». Orokorrean, atera ohi diren karrozek «gibeletik lan handia» izaten dutenez, «karrikak jendez betetzen» direla adierazi du.
Haurrak zirela gurasoen laguntzarekin egiten zituzten prestaketa-lanak. Koxkortu ahala, ordea, gurasoen laguntza utzi eta bakarrik egiteari ekin zieten: «duela hamar bat urte, bakarrik atera ginen lehendabiziko urte hartan, mini-moto batekin bultzatu genuen karroa».
Ordutik hainbat «eta urtetik urtera hobeak» izan dira landutako gaiak eta orgak. «Itsasontzi haundi bat» egin zutenekoa du gogoan, «aunitz» gustatu baitzitzaion. Dena dela, ikusleentzat politena joan den urtekoa izanen zela gaineratu du: «Moulin Rouge kabaret karroza egin genuen eta txapeldunak izan ginen…».
«Umorea» helburu
Jantzia edozein izanik ere, bada bere kuadrillak berezkoa duen zerbait. «Urtez urte prestaturiko mozorroari gordinkeria ukitu bat ematen» saiatzen dira. Jakin badakite «ikusle guztiei ez zaiela gustatzen» baina horren helburua «umoretsu eta aldarte onean egotea» dela gaineratu du.
Normalean gaia pentsatu eta «hiru bat aste lehenago» hasten dira buru-belarri lanean. Hamabortz lagun inguru bildu eta «dezentea» den zerbait plazaratzeko «eginahalak» egiten dituzte. Ttikikeria batzuk falta badituzte ere, aurtengoa dagoeneko martxan dute: «denbora gutxi behar izan dugu, joan den urtekoa desegin gabe genuenez hori baliatu dugu eta».
Elkarlanean
Kuadrillarekin orga prestatzen egiten duen lanaz gain, inauterien bueltan Udalak antolatu ohi dituen bileretan ere parte hartzen du: «gazteok eta Udalak otorduak eta bertzelako kontuak zehaztu behar izaten ditugunez, lagun-taldetik baten bat joan behar izaten da». Guztien elkarlanari esker, aurten ere inauteri ederrak prestatu dituzte Donezteben: «ongi pasatzeko ezer txarrik ez gertatzea baino ez dugu behar».