Larunbat eguerdian haurrendako bazkaria izanen da Herriko Ostatuan eta iluntzean afaria eginen dute Itturrondo elkartean
Inauteriak ate joka dituzte beintza-labaiendarrek. Hirugarren larunbatean, otsailaren 16an, ospatuko dituzte aurten. Herriko gazte eta helduek Itturrondo elkartean afalduz eginen diete keinu. Dena dela, gainontzeko herritarrentzat ere izanen da jarduerarik. Egun berean, eguerdian, haurren eta gaztetxoen txanda izanen da. Herriko Ostatuan bilduko dira eta bertan bazkalduko dute.
Antzina lauzpabost egun
Gaur, egun bakarrean ospatzen duten ospakizun hori garai batean lauzpabost egunekoa zen.
Izan ere, orduan herriko gazte gehienek mendian lan egiten zuten eta negua etxean pasa ohi zuten. Hori horrela, inauteriak lauzpabost egunez ospatzen zituzten.
Egun horietan ekitaldi dezente izaten zituzten. Karrozak ez ezik, joaldunak eta mozorroak karriketan barna ibiltzen ziren eta plazan aizkora apustuak jokatzen zituzten.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.