Sunbillako abesbatzak bere aurkezpen kontzertua eskainiko du urtarrilaren 19an

Ttipi-Ttapa 2019ko urt. 18a, 08:00
Sunbillako abesbatzako kideak, ortzegun arratsean elizan egin zuten azken entsaioan.

Larunbat arratseko 7:30ean elizan, Isabel Lakarren gidaritzapean 

Sunbillako abesbatzak bere lehen kontzertua eskeiniko du herriko elizan, urtarrilaren 19an, larunbatean 19:30ean Isabel Lakarren gidaritzapean.

Hamazazpi kide ditu guztira abesbatzak: Juanjo Ibarra, Hilario Urtxegi, Jose Luis Iriarte, Esteban Maritxalar, Juan Tomas Latasa, Pako Errandonea, Bidal Ibarra, Jose Martin Iriarte, Teresita Iriarte, Maite Etxenike, Maite Ibarra, Maider Petrirena, Nerea Petrirena, Nieves Biurrarena, Anabel Almandoz, Loli Oharriz eta Floren Arretxea. Zuzendaria, Isabel Lakar lesakarra da.

Sunbillako abesbatzak betidanik ospakizun jakinetan (Eguberriak, Aste Santuak, korpus eta Santiburtzio egunean) abesteko ohitura zuen, Basilio Sarobe apaizaren gidaritzapean. Don Basilio gaixotu eta herritik joan zenetik abesbatzak aitzinera segitzeko norbait bilatu behar zela eta Isabel Lakarri galdetu zioten ea posible zuen hilabetean behin beraiekin entsaiatu. Horrela hilabetero hirugarren ortzegunean, udaletxeko hirugarren solairuan entsaiatzen dute.

Ikasitakoa erakustearren kontzertu bat egitea erabaki dute eta larunbat honetan, urtarrilak 19, 19:30ean eginen dute Sunbillako elizan. 

Kyrie, O bella mia esperanza, Bili bili bonbolo, Txakolin, Txarmangarria, Elurra mara mara, Itxasoa eta Kaiku abestuko dituzte.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun