Doneztebeko liburutegiak, 12 urtetik goitikoendako, indarkeria matxistaren aurkako ipuin lehiaketa antolatu du lehendabizikoz. Aurkezturiko lanak bi kategoriatan banatuko dira: 12-16 urte bitartekoak –DBHko ikasleak– edo 16 urtetik goitikoak.
Euskaraz edo gazteleraz idatzi ahal izanen dira eta parte-hartzaile bakoitzak orrialde bateko lan bakarra aurkez dezake. Ipuin horrek originala, argitaratu gabea eta aurkezten den hizkuntzan idatzia izan behar du; hau da, itzulpenik ez dute onartuko. DIN A4 formatuan, espazio bikoitza eta Arial letraz (12ko tamainan) aurkeztu behar dira.
Gaia eta epea
Lanak sortzeko honako gai hau jarri dute: "Zer eginen zenuke zure inguruko norbaiti bikotekideak tratu txarrak eragiten dizkiola jakinen bazenu?". Lanak otsailaren 8a arte aurkez daitezke posta arruntez (Foru enparantza 1, 31740, Doneztebe) edo elektronikoz bidalita (bibliodoneztebe@yahoo.es helbidera idatziz).
Sariak
Kategoria bakoitzeko hiru sari izanen dira: 12-16 urte bitarteko irabazleak Ostiz liburu-dendan gastatzeko 100 euroko erosketa-txartela eskuratuko du; bigarrenak eta hirugarrenak, berriz, 50 euroko erosketa-txartela. 16 urtetik goitiko irabazleak 150 euro jasoko ditu; bigarren eta hirugarrenek, berriz, 50 euroko erosketa-txartela.
Lehiaketaren oinarriei buruzko zehaztapenak Doneztebeko Udalaren webgunean ikus daitezke.