Nafarroa nagusitu zaio Bizkaiari Donezteben jokatutako herri kirol eta crossfit desafioan

Ttipi-Ttapa 2018ko abe. 26a, 09:22

Arraiozko Xabier Urrutia eta Iruñeko Alex Fernandez irabazle suertatu ziren abenduaren 22an Donezteben, Ousmane Dramé eta Oscar Perez bizkaitarren kontra jokatutako herri kirol eta crossfit desafioan. 

Hilabeteak pasa dituzte nafarrek eta bizkaitarrek proba hau prestatzen, gogor entrenatuz. Hitzordua abenduaren 22an, larunbat arratsaldeko 6etan zen Doneztebeko Ezkurra pilotalekuan.  

3.000 euro jokoan, bikote bakoitzak, txanda librean, 80 kiloko herri bolari 80 altxaldi eman zizkion, 70 kiloko bi txingekin 20 metroko 20 plaza egin zituzten, 50 kiloko bi 50 C&J pesa, bi kolpetan altxatu zituzte 50 aldiz eta arpanan, 15 epai egin zizkioten kanaerdikoari,

Nafarrek nagusitasuna erakutsi zuten Bizkaiako bikotearen aitzinean txapela irabaziz. Frontoia bete egin zen eta ikusleek sekulako mailako jaialdia ikusteko aukera izan zuten. 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun