Errespetuzko harremanen aldeko kanpaina
Malerrekako Mankomunitatea osatzen duten 13 udalerriak Malerreka errespetuzko harremanen alde –Eraso matxistarik ez leloa daukaten olanak estreinatuko dituzte azaroaren 25ean, Nazioarteko Emakumeenganako Indarkeria Aurkako egunaren harira.
Udaletxeetako balkoitik zintzilikatuko diren olana horiek bi helburu barne hartzen ditu bereziki. Alde batetik, biztanleria eraso matxisten aurkako borrokan inplikatzea eta kontzientziatzea eta, bertzetik, aniztasuna onartzen duen eta errespetuan oinarritzen den eskualde bateko aldarrikapena egitea.
Hain zuzen, irudi hori azaroaren 25ean ez ezik, martxoaren 8ko Emakume Langilearen Nazioarteko Egunean eta herri bakoitzeko inauterietan eta bestetan jartzeko asmoa dute.
Bertzalde, Prebentzio Batzordeak eraso bat jasan edo ikusiz gero eman beharreko pausoak zehazten dituen kartel batzuk ere diseinatu ditu.
Kartelean bertan, kontakturako telefono batzuk ezarri dira, egoera bakoitzaren aitzinean nora jo daitekeen argitzeko lagungarria izanen delakoan: 112 arreta protokoloa eta larrialdietarako; 948 581864 (Foruzaingoa, salaketa judizialerako) eta 638 529785 (Prebentzio Batzordea, salaketa sozialerako).
Bertze ekitaldiak
Arestian aipatutako tailer horietaz gain, Malerrekan antolatu diren ekitaldien harira, aipagarriena azaroaren 23an (ostirala) eginen den elkarretaratze alaitua izanen da. Ekitaldia Doneztebeko biribilgunean eginen dute eguerdian eta indarkeria matxistaren aurkako aldarria eginen da. Bertzalde, Iturenen 15 urtetik gorako pertsonentzako Bakarketetan ikuskizuna ikusteko aukera izanen da, azaroaren 25ean bertan 18:00etan Udaletxeko Ganbaran.