Bertso-afari musikatua Sunbilla
Urriaren 6an, larunbata, Sunbillan eginen da kultur hitzorduetan lehenbizikoa. Ulibeltzak elkartean bertso-afari musikatua antolatu dute. Bertsotan Andoni Egaña, Alaia Martin eta Jon Martin ariko dira eta musikaz Ixak Arruti eta Gari Otamendi arduratuko dira.
Afaria larunbatean 21:00etan hasiko da eta txartelak udaletxean eta Fonda ostatuan eros daitezke, 35 eurotan.
Bakarrizketa saioa Zubietan
Euskararen Eguneko ospakizunen barne, Jon Martinezen eskutik umorezko bakarrizketari tokia eginen diote Zubietan urriaren 12an. Barrez blai emanaldia eskainiko da 20:30ean estalpean. Sarrera dohainik izanen da.
Saio honetan euskaldunen egunerokoan hurbilekoak diren gaiak ukituko ditu Martinezek, eta maitasunezko euskal abestien errepaso ttiki bat ere eginen du. Inprobisaziorako tartea ere izanen du bere saioak, eta ikusleen parte-hartzea ere sustatuko du.
Magia eta ipuin-kontalaria Urrozen eta Beintza-Labaienen
Kultur Biraren hondarreko bi hitzorduak Urrozen eta Beintza-Labaienen eginen dituzte, urriaren 20an eta 27an, hurrenez hurren. Urrozko plazan, Oliver Magoa, Blue, Eva & Liuba izanen dira plazan, 12:30ean hasita. Gainera, 11:00etatik 12:30era eta 15:00etatik 19:00etara puzgarriak izanen dituzte plazan. Beintza-Labaienen Ameli ipuin-kontalaria Herriko Etxean ariko da, 17:00etan.