Onddo eta Zizen Kofradiako kide berriak izendatu dituzte Elgorriagan

Onddo eta Zizen Kofradiako kide berriak, presidentearekin eta idazkariarekin eta bertze kofradietako kideekin.

Igandeko hogeita bosgarren edizioan Juanito Mariezkurrena zenaren omenez jokatutako kaxuela lehiaketan Irungo Anaka suertatu zen irabazle

Aurten hogeita bosgarren edizioa bete du Nafarroako Onddo eta Zizen Egun haundiak Elgorriagan, Onddo eta Zizen Kofradiak antolatua. Irailean 30ean, kofradiako kide berriak izendatu zituzten eta onddo eta bertzelako produktuak dastatzeko aukera paregabea izan zuten Elgorriagara hurbildutakoek.

 

Aurtengoan, Francisco Ferreras Garmendia pilotari ohia (1970. hamarkadan Espainiako txapeldun izan zen pala motzean eta Sunbillarekin lotura handia du), Javier Aldabe Villanueva urologoa, Ruth Vera Garcia doktorea eta Espainiako Onkologia Elkarteko presidentea eta Francisco Goikoetxea Zubezu, Arbizuko txistorragilea (hau ere pilotaria izana Zubelzu II.a izenarekin) izendatu dituzte Ondddo eta Zizen Kofradiako kide berri. Bertze aldetik, Jose Miguel Galerregi kofrafiako presidenteak ere opari bat jaso zuen Zainzuriaren Kofradiaren eskutik, landa eremuaren alde egindako lanarengatik eta bertze oroigarri bat eman zioten lehen aldiz Elgorriagan izan den Donibane Lohizuneko Kortsarioen Kofradiari.

Kofradien artean jokatu zen kaxuela lehiaketa, Juanito Mariezkurrena zenaren omenez. Irungo Anaka kofradiak lortu zuen lehen saria, Erronkariko gaztaren kofradiak bigarrena eta Nafarroako oliba olioaren kofradiak hirugarrena.

Igande goizeko egitaraua bainuetxetik herrirako kalejirarekin abiatu zenm Zubietako joaldunek eta Anakako bandak lagundua. Gero, Liguori abesbatzak kantatutako meza izan zen eta ondotik izendatu zituzten kofradeak.

 

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun