Endika Urrutiak aunitz sufritu behar izan zuen estreineko partida horretan. Baina ez Azpirozen jokoarengatik, saldiastarra 14-4 irabazten ari zela bikian min hartu zuelako baizik, eta zalantzan jarri zen partida akituko zuenik ere. Halere, 27-14 irabazten jarri zen eta hiru tantoren faltan bazirudien garaipena erraz lortuko zuela. Ez zen horrela izan. Azpiroz 27-21 eta 28-24ra hurbildu zen. Baina errestoarekin eta sakez egindako zortzigarren tantoarekin lortu zuen Endikak garaipena (30-25).
Finalaurreko ligaxkarako txartel bila
Gauzak honela, Endika eta Josetxo Ezkurra II.a aurrez aurre izanen dira abuztuaren 9an, ortzegunean, buruz buruko txapelketarako finalaurrekoetako ligaxkarako txartel baten bila. Irabazleak esperoan izanen ditu Urriza txapelduna, Xanti Uterga doneztebarra eta Barrenetxea IV.a. Abuztuaren 11n, Uterga eta Urrizaren artean jokatuko duten partidarekin hasiko den ligaxka honetako irabazleak irailaren 8an jokatuko den finalerako txartela lortuko du zuzenean. Bigarrenak eta hirugarrenak finalerdia jokatuko dute irailaren 1ean.