«Herriko bestak kirola guztiz baztertu gabe baina besta lehenetsiz bizi ditut»

Ttipi-Ttapa 2018ko abu. 8a, 06:40
Koldo Herrera txirrindularia, kirolzalea ez ezik, bestazalea ere bada.

Koldo Herrera, Sunbillako gazte kirolaria

Sunbillako gazte «kirolzale eta bestazalea» da Koldo Herrera. «Zazpi urte zituela» hasi zen bizikleta lasterketetan eta aitzinetik «judoan» ere aritu zen «pare bat urtez». 

 

Herria aitzineko asteburutik mugiaraziz

Oro har, «herriko lasterketak» nahiago baditu ere, Lizarrako bizikleta taldean ari denez, urtean zehar lasterketa gehienak han jokatzen ditu. Aurten «kadete mailan» dago eta taldearekin Valentzia eta Alacanten ere ibili da. 

Hankak ez ezik, besoak astintzen ere trebea da Herrera. Hortaz, bestetako frontenis txapelketan izena eman zuen: «aurten txapelketan 32 bikote ari gara, harrituta gelditu gara parte-hartze kopuruarekin». Herriko bestetan bizikleta eta erraketa guztiz baztertzen ez baditu ere, «besta lehenesten dut». Hain zuzen horrexegatik, «azken urteetan» ez du herri-krosean parte hartzen: «ohatzean gelditzen naiz».

 

Eguna irauliz

Egunez «ahal bezainbertze lo egin eta deskantsatuz» eta gauez «bestan» pasatzen ditu bortz egunak: «ahal den bezala bizi ditut bestak» dio irriz. Halere, Peñen Egunean «eguneko saltsa hori herri guttitan izaten dena delako» ez du hutsik egiten. Egunekoari gauez segida emateko «gustuko dudan musika-talderen bat» ekarriko luke sunbildar gazteak. Gainerakoan, ez du uste egitarauan aldaketarik behar denik. Jarrera bestazalea izanez gero gutti aski den seinale…

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun