Doneztebe The Moment taldean, Pascual Bertiz sakalaria, Julen San Miguel numeroa eta Jokin Arraztoa eta Javier Bertiz laurdenak aritu ziren; Azpitxapeldun izan zen Doneztebe Avia taldearekin Javier Almandoz sakalaria, Asier Mutuberria numeroa, eta Jokin Apezetxea eta Juan Telletxea laurdenak.
Lehenbiziko jokoa txapeldunek egin zuten, baina bana berdindu zuen Aviak. Hurrengo hiru jokoak segidan egin zituen The Moment taldeak (4-1), baina 4-3kora hurbildu zen Avia. Hori izan zen bere azken jokoa, ordea. Txapeldunek, zuzen jokatuz, bertze bortz jokoak segidan egin zituzten, Donezteberentzat hogeigarren txapela lortzeko (15 aldiz txapeldun orde izan da); Iruritak 12 txapel ditu eta bertze hainbertzetan txapeldun orde izan da; Oizek lau txapel ditu eta zazpi aldiz txapeldun orde izan da eta Arraiozek hiru txapel eta lau aldiz bigarren izan da.
Alberto San Miguel oiztarra aritu zen marrazain, eta Doneztebeko Eduardo Oiartzabal eta Iban Santesteban eta Oizko Lander Mendiola epaile.
Sari banaketan, Dori Lopez, Nafarroako Gobernuko Kultura saileko zuzendari nagusia; Josu Janices, Kirol eta Gazteria Institutuko zuzendari ordea; Joxe Artetxe, Pilotarien Biltzarrako presidentea eta Alberto San Miguel bera izan ziren.
Hirugarren postua Iruritara
Larunbat goizean jokatu zen hirugarren posturako norgehiagokan Irurita Migelene taldeak (Xabi Barberena sakalaria, Gorka Urtasun numeroa, eta Egoitz Prim eta Jagoba Ramos laurdenak) 9-8 irabazi zion Arraioz Sagardia taldeari Mikel Mindegia, Xabier Mindegia, Jon Gamio eta Sergio Navarro).
Sariak banatu ondotik, Herriko Ostatuan afari eder batean bildu ziren jokalari, antolatzaile eta laguntzaileak.