Sanferminetako erremonte txapela Saldiasera joanen da aurten

Ttipi-Ttapa 2018ko uzt. 11a, 11:05
Aritz Juanenea saldiastarra Urrizari nagusitu zitzaion aitzineko koadroetan, asteartean jokatutako finalaurrekoan. Argazkia: Maialen Andres

Juaneneak eta Barrenetxea IV.ak ezustea eman eta Urriza eta Etxeberria III.ari irabazi diote bigarren finalerdian eta Ezkurra II.a eta Endikaren kontra ariko dira uztailaren 12an 

Ezkurra II.a eta Endika, Juanenea eta Barrenetxea IV.aren kontra. Horixe izanen da uztailaren 12an jokatuko den Iruñeko Sanferminetako erremonte txapelketaren finala. Beraz, Juanenearekin edo Endikarekin, txapela Saldiasera etorriko da, bai ala bai. Gainera, Koteto Ezkurra omenduko dute Uharten ortzeguneko jaialdian.

 

San Fermin egunez jokatutako lehenbiziko finalaurrekoan, Josetxo Ezkurra doneztebarrak eta Endika Urrutia saldiastarrak 40-38 irabazi zieten Xanti Uterga doneztebarrari eta Ion-i, partida gogor batean.

Uztailaren 10ean, berriz, Aritz Juanenea saldiastarrak eta Barrenetxea IV.ak ezustea eman eta 40-32 irabazi zieten Urriza eta Jose Javier Etxeberria III.ari, joan den urteko txapeldunei. Juaneneak menpean hartu zuen Urriza aitzineko koadroetan eta 21 tanto egin zituen eta bortz pilota galdu. Urrizak 13 tanto egin zituen eta lau pilota galdu.

Promesa mailako finalean, Eloy Gaia doneztebarra eta Azpiroz, Etxarri eta Martirenaren kontra ariko dira.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun