Donamarian uztailaren 5ean abiatuko da 2018ko Kultur egitaraua

Trío Palatino taldeak joko du musika eta Valdi eta Marcela bikotea dantzari ariko da ortzegunean Donamariako Jauregian.

Jauregian joko du Trío Palatino taldeak, Valdi eta Marcela dantzari-bikotearekin batera, ortzegunean 20:00etan

Nafarroako Gobernuko Kultura, Kirol eta Gazteria Departamentuak antolatutako Kultur 2018 programaren baitan, ekainaren 22tik irailaren 8ra musika, dantza eta arteko 36 emanaldi prestatu dituzte. Ortzegun, ortzirale eta larunbat guztietan eginen dira Nafarroako 36 udalerritan. Eskualdean, Donamaria, Elizondo, Zugarramurdi, Leitza eta Bertiz ukituko ditu. Uztailaren 5ean, ortzegunean, 20:00etan, Donamariako Jauregia dorretxean joko du Trío Palatino taldeak, Valdi eta Marcela dantzari bikotearekin batera.

 

Roberto Casadok (txirula), Carlos Secok (biola) eta Sergio Larrionek (gitarra) osatzen dute Trío Palatino; hiru musikari horiek prestakuntza handia dute eta esperientzia zabala ganbera musikan; horri esker, banakako nahiz taldekako ganbera kontzertuak eman dituzte zenbait herrialdetan. Oraingoan, Valdi eta Marcela dantzari bikotearekin batera hartuko dute parte, Tangoan eta Argentinako folklorean espezializatutako dantzariak.

 

Hurrengo ekitaldiak eskualdean

Abuztuaren 3an, ortziralean, 20:30ean, Aukeran dantza konpainiak Fusioak eskainiko du Elizondoko plazan.

Abuztuaren 23an, ortzegunean, 18:00etan, Mara musikari portugaldarra izanen da Zugarramurdiko lezeetan.

Irailaren 7an, ostiralean, 20:00etan, Leitzako plazan Kepa Junjera eta Sorginak emakume taldea ariko dira, tradizioa eta sormena elkartuz.

Arte plastikoak Bertizko Jaurerriko Jauregian finkatuko dira uztailaren 20tik abuztuaren 20ra bitartean, aunitzek handikeriarik eta zabarkeriarik gabeko pintura lasaiaren maisutzat jo duten Javier Ciga Echandi (Iruña, 1877-1960) margolari nafarraren obrari buruzko Figurazioa eta esentzia erakusketarekin.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun