erran.eus

Saldiasko San Juan bestak ekainaren 22tik 24ra ospatuko dituzte

  Gizartea  Malerreka  Saldias

Ostiralean zopa jatea, larunbatean bertso bazkaria eta igandean mariatxiak izanen dituzte, besteak beste 

Uda usainarekin batera besta giroa hedatzen hasia da Saldiasen. Ostiraletik igandera bitarte ospatuko dituzten San Juan bestetan, haur, gazte eta helduek hiru eguneko egitarauaz gozatzeko aukera izanen dute. Besteak beste, ostiralean zopa jatea; larunbatean, Muñoa eta Lizarralderen bertsoek girotutako bazkaria; eta igandean, Puro Relajoren kontzertua izanen dituzte. 

Saldiasko San Juan bestak ekainaren 22tik 24ra ospatuko dituzte
Mahaiaren inguruan hainbat ospakizun izanen dituzte aurten ere Saldiasen. | Ikusi handiago | Argazki originala

 

Ostirala  22 

09:30eko argisoinuekin abiatuko dute eguna, txistularien eskutik. Goizean umeentzat jokoak izanen dira. Arratsaldeko 15:30etik  20:30era umeen parkea  (jumping, karts, gaztelu haizatuak) izanen dute gozagarri. Egun osoan iragarritako besten hasiera 20:00etako txupinazoaren bidez lehertuko da eta ohiturazko zopak izanen dira dastagai, herriko ostatuan. Gauez Txingudi Deejays-ek girotuko du herria. 

 

Larunbata 23

Herritarrak esnarazteko 09:30ean, argisoinuak izanen dira, txistulariek girotuak. 11:00etan herriko mus txapelketa jokatuko dute.14:00 herri bazkaria izanen dute, Muñoa eta Lizarralde bertsolarien doinupean. Arratsaldez bertso-pilotez (herriko gazteen arteko pilota partidak bertsolariek alaituak) gozatzeko aukera izanen dute. 22:00etan San Juan suen bultan bilduko dira. Bai arratsaldez baita gauez ere Basajaun taldearen musikak girotuko du herria.

 

Igandea 24

Igandean, eguneroko txistulariekin hasiko dute eguna, 09:30etik aurrera. 11:00etan Meza Nagusia izanen dute, San Juan herriko patroiaren omenez. Ondotik, Udalak mokadutxoak eskainiko ditu, Herriko Ostatuan. 13:00etan, aizkorazaleentzat, Ruben Saralegi eta Jon Rekondoren arteko norgehiagoka izanen da ikusgai. 18:00etan herriko gaztetxoen arteko herri kirolak jokatuko dituzte. 19:30ean Puro Relajoren mariatxiak izanen dira entzungai. 21:00etan patata tortilla lehiaketa eginen dute eta segidan, tortillak janen dira. Udalak txistorra, gazta eta edariak ere eskainiko ditu. Bien bitartean, Oihana-Oihana trikitilariek alaituko dute giroa. Festei bukaera emateko su artifizialak botako dituzte. 

2018/06/20 07:20 - 07:20

Malerreka Saldias

Ekitaldi gehiago »»

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa