Pulunpa eskolakoek ekainaren 19rako ikasturte bukaerako besta antolatu dute

Joan den urtean margolanak egin zituzten

Bazkarirako txartelak Herriko Ostatuan daude salgai, ekainaren 13a bitarte

Ikasturteko hondar egunak dituzte Pulunpa eskolan. Ikasturtea borobildu eta udari ongietorria egiteko, heldu den asteartean, ekainaren 19an, besta eguna izanen dute. Aurten lortutako diru guztia besta horretan gastatu beharrean eskola egiteko edo bertze taller batzuk antolatzeko gordetzea aurreikusi dute. Horretarako, gurasoei parte hartzeko deia egin diete. Egunean eginen dituzten ekintzetan parte hartzeko zerrendak eskola atarian paratu dituzte. Hala, parte hartu nahi duen orok bertan idatz dezake.

 

Goizean irakasleek antolatutako jarduerez gozatzeko aukera izanen dute. Ondotik, lehendabiziko haurrek eta gero helduek plazan bazkaltzeko aukera izanen dute: entsalada, kroketak (gurasoen eskutik), paella eta izozkia eskainiko dira. Helduek 10 euro ordaindu beharko dituzte (edaria eta kafea barne); haurrek, aldiz, dohainik izanen dute. Bazkariko txartelak Iturengo Herriko Ostatuan eros daitezke, ekainaren 13a arte.

Eguna borobiltzeko aurpegi margotzea, musika emanaldia, zunba saioa (haur eta helduendako), merienda eta eguraldiaren arabera joku batzuk edo bertzeak izanen dituzte.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun