Urtero bezala, larunbat goizeko 10etan frontoian elkartu ziren haur, gazte zein helduak. Denak mozorratuta etxez etxe ibili ziren Oihana-Oihana trikitilariekin.
Bazkaldu ondotik, helduek baserriak alaitzen zituzten bitartean, haurrek eta gazteek frontoian hainbat joku, musika eta txokolatadarekin gozatu zuten.
Gauean afaria Barranka Ostatuan izan zen. 50 bat lagun elkartu ziren. Ederki afaldu eta gero, Aitor Mendiluze eta Sustrai Colina bertsolariek batzuen masailak gorritu zituzten: batean Fidel Castro bertan zegoela, Cupidok norbait ukitu zuela eta antzeko hainbat kontu ibili zituzten bertso ederrak egiteko.
Bukatzeko, trikitilarien txanda izan zen. Dantza eta abestiekin askok biharamunera arte luzatu zuten ihote eguna.