Herritarren lana
Egun, Sunbilla «aunitz» maite du, «bai herritarrak, bai lasaitasuna eta edertasuna, baita gainerako herriekiko duen hurbiltasuna ere». Urteko egun politenak «bestak eta inauteriak» dira berarentzat, eta bereziki, inauterien itzalpean «borondatez, ordainsaririk gabe, egiten duten lana» miresten du: «batzuek salda, gaztainak, tortilla, taloa eta ardoa banatzen dute; bertzeek, berriz, desfilerako izugarrizko lana hartzen dute», eta guztia «ikusleak zapore gozoz uzteko». Azken batean «herritarren lanak ikuslerik gabe balio ez duenez», eta «ikusleak herritarren lanaz gozatzera etortzen direnez», norabide bikoitzeko hartu-eman hori «gori-gori mantentzearekin» amesten du. Baina, dudarik gabe, «ikusleak orain artean bezala zainduz gero, ahoz aho hedatu, eta ezagutzen dutenak itzultzeaz gain, jende gehiago etortzen da».
Inauteriak bizitzeko moduak
Urtez urte, era batera edo bertzera bizi izan ditu inauteriak. Hasierako urteetan Valladoliden biziagatik, «inauterietara etorri eta koinatuaren ostatuan lanean» pasatzen zituen egun horiek, «eta horrek, bestaz gozatzen zutenekin enpatia sentituz, besta giroa lehendabiziko ilaran bizitzea ahalbidetzen zigun». Azken urteetan, berriz, karrika xokoetan ibiltzen da, «karrozarteko koloreetan nahasirik, parte-haztaileen giroa eta bisitarien harridura sentituz». Karrozen harat-honatean, ikusleen artean zozketa-billeteak saltzen ditu «Maria Jesus Jorajuria eta Joseba Altzurirekin batera» bera aduratzen baita horretaz. Txartelak saltzeko «lotsa gutti eta aurpegia ematea» ditu sekretu. Eta «zenbaitetan astun xamarrak bagara ere», aunitzek erosten dute. Gehienak «elkartean saltzen ditugu», eta «nik, pertsonalki, lagun kuadrilek gosaltzen duten ostatu, denda eta txokoak aprobetxatzen ditut». Ikusleek ere «ekarpen handiak egiten dituzte». Batzuen kasuan zozketa aitzinetik alde egiten dutenez, «telefonoak hartzen ditugu, saridunak jakinarazteko, eta ho-rrek ere laguntzen du».
Omenaldia
2014an, Sunbillako herritarrek hainbat urtetan, inauterien bueltan boletoak salduz, egiten duen lana eskertzeko, omenaldia egin zioten. Gogoan du momentua, «ilusio handiz» bizitakoa, «inondik inora espero ez zuen txapela jantziz» burua estaltzeaz harago, bihotzera ailegatu zitzaion eta.