Iker Vicentek 32 minutu eta 37 segundo behar izan zituen lau kana-erdiko, 60 ontzako bertze lau eta bi oinbiko mozteko. Hasieratik bukaerara jaun eta jabe izan zen eta bi minutu eta erdi baino gehiago atera zion txapeldunorde izan zen Jon Rekondo leitzarrari (35:15). Mieltxo Mindegia zubietarra hirugarren izan zen (36:48). Laugarren postua Ruben Saralegi leitzarrak eskuratu zuen (38:44) eta bosgarren postua, lehen finalean, Zigako Joxean Etxeberriak lortu zuen (39:41).
Apustua
Finala akituta, Luis Txapartegi gipuzkoarrak desafioa bota du. Euskal Herriko bigarren mailan aurten aritu den edozeini bota dio, Ruben Saralegiri izan ezik. Euskal Herriko lehen mailako finaleko lanera jokatuko luke (lau kanaerdiko, lau 60 ontzako eta lau oinbiko) eta azaroaren 23an, ortzegun arratseko 8etan egonen da Tolosako Kantabriko ostatuan zain.