Magiarekin abiatuko da Malerrekako Kultur Bira urriaren 7an Oizen

Ttipi-Ttapa 2017ko urr. 5a, 07:58
Sergio de Andres magoak emanaldia eskainiko du larunbat arratsaldean Oizen.

Sergio De Andresek larunbat arratsaldean eskainiko duen saioaren ondotik, Ezkurran, Elgorriagan eta Legasan ere izanen dira emanaldiak

Malerrekako Mankomunitateko Euskara  Zerbitzuak, eta Oizko, Ezkurrako, Elgorriagako eta Bertizaranako udalek Malerrekako Kultur Bira antolatu dute. Kultur biraren bosgarren edizioa da eta honetan ere programazio erakargarria eskaini nahi izan diete Malerrekako eta inguruko bizilagunei. Urriaren 7an, larunbat arratsaldeko 5etan, Sergio de Andresen Majikus magia eta ipuinen emanaldia izanen dute Oizen.

 

Mago xistera batean ipuin hauts batzuk, magia pixka bat eta txiste tantta batzuk nahasten baldin baditugu Sergio de Andresekin batera, magikoki ilusioz beteko gara eta ederki barre egingo dugu. Eta untxia aurkitzen duenak itzuli diezaiola, gizajoak azkenekoan galdu eta ez du geroztik aurkitu.

Urriaren 14an, Ezkurran bi ekitaldi izanen dituzte. Larunbat arra­tsaldeko 5etan DJ Po­rru, bereziki haurrei zuzendutako ikuskizun dibertigarria izanen da. Familia giroan ongi pasatzea da Dj Porruren helburua, abesti eta dantzekin. Arratseko 8etan berriz, triki-bertso-afaria eginen dute Barranka Ostatuan, Iker Zubeldia eta Iban Urdangarin bertsolariekin. Izen-ematea urriaren 10a baino lehen egin behar da 948 615098an.

Urriaren 21ean, larunbat arratsaldeko 6etan Pepa ta Kutxo bikotearen klown ikuskizuna izanen da Elgorriagako Kultur Etxean.

Urriaren 28an, azkenik, Ameli ipuin-kontalaria izanen da Legasako eskolan: larunbatean 11:00etan, 3 eta 6 urte bitarteko haurrentzat eta 12:30ean, 7 urtetik goitikoentzat. Ameli ipuin kontalaria herriz herri, ipuinak ametsekin josten aritzen den neska gaztea da.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun