Berez irailaren 12an, joan den asteartean hastekoak ziren lan horretan, baina egun horretan, Nafarroako Gobernuko Toki Administrazio, Ingurumena eta Lurralde Antolaketako teknikariak izan ziren presa inguruan eta azken egunetako eurien ondorioz ur-emari handia zela eta bertan behera utzi zuten lanen hasiera. Baina behin betiko atzerapena bertzerik ez zen izan eta, aipatu bezala, irailaren 21ean, ortzegunean hasiko dira eraiste-lanetan, aipatutako osagai horiek errespetatuz eta zaharberrituz, Ingurumen Departamentuko eta GAN-NIK (Gestión Ambiental de Navarra-Nafarroako Ingurumen Kudeaketa) enpresa publikoko langileek jakinarazi dutenez.
Herrian ere eztabaida sortu da obra honen inguruan. Aurtizko bizilagunek batzarra egin zuten eta hiru mendetako historia duen Igerizarretako presa intereseko ondare izendatzea eskatu zuten ahobatez: «Moldatzea ongi iruditzen zaigu, baina ez botatzea, agindu hori geldiaraztea eskatzen dugu».