Doneztebeko Turismo Bulegoa irekiko dute uztailaren 4an

Ttipi-Ttapa 2017ko eka. 30a, 11:43
Doneztebeko Turismo Bulegoa, 2010ean inauguratu zutenean.

Turismoa bultzatzeko gida eta mapa ere argitaratu ditu Udalak 

Doneztebe prest dago aurtengo udan bisitatuko gaituzten turistei harrera egiteko. Uztai­laren 4tik aitzinera eta irailera bitarte bertako turismo bulegoa zabalik egonen da: asteartetik igandera zabalik egonen da goizez, 11:00etatik 13:30era eta arratsaldez, 17:00etatik 19:30era. Turismoa bultzatzeko Udalak Doneztebeko gida berria kaleratu du baita bertako mapa ere. 

 

Bi euskarri berri hauek ere landetxe eta bertze hainbat tokitan ere banatuko dira gure herria ezagutarazteko. Horretaz gain, aurten ere bisita gidatuak eskainiko dituzte.           

 

Udako ludoteka prest

Uztailaren 3an hasita, eta bi hilabetez, udako ludoteka martxan egonen da. Zerbitzu hau  astelehenetik ortziralera eskoletako gimnasioan burutuko da, goizez, 09:00etatik 14:00etara. Iaz bezala, Udalak adina mugatu du; aurten 2008-2014 bitarteko umeentzako  zerbi­tzua izanen da.

Aipatu behar da aurtengo eskaria ikusita (24 neska-mutikok eman dute izena), Udalak bi talde martxan jarriko dituela, monitore bana izanda: Amaia Iraola eta Inaxio Agara. Uztailean eta abuztuan jokoak, musika, tailerrak eta bertze hainbat ekintza egiteko aukera izanen dute 24 txiki hauek.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun