Emanaldi laburra izanik ere, bertan musikaz gain, pintura, bertso-olerkiak eta antzerkia ere izanen dira. Guzia, abesbatzako emakume artisten eskutik. Mendiko gizonek ere egun berezi honetan parte hartu nahi izan dute, eta horregatik, azkeneko kantetan emakumezkoekin batean ariko dira besta giroan.
Egunarekin lotutako doinuak aukeratu dituzte emanaldirako guziek, tartean, Mikel Markezek Uxue Alberdiren hitzekin sorturiko ‘Konplize ditut eta’ kantaren bertsio eta guzi. ‘Ñoño kanta’ herri doinua eta Pier Paul Berzaitz-en ‘Baratze bat’ ere kantatuko dute. Ondotik, emakumeek eta gizasemeek elkarrekin Rosanaren ‘Si tú no estás aquí’, Aita Donostisaren ‘Alduden gizonik ez’ eta ‘Guantanamera’ Kubako doinua abestuko dituzte.
Emanaldiaren ondotik, herrigunean afaria izanen dute.
Azken ekitaldiak Malerrekan
Emakumearen Egunarekin lotutako azken ekitaldiak eginen dira egunotan Malerrekan.
Martxoaren 11n, Zubietan Fatima filma eskainiko dute eskolan larunbatean 19:00etan eta 21:00etan afaria Herriko Ostatuan. Eratsunen, argazki erakusketa zabalduko da eta 21:00etan afaria Elietxe ostatuan.
Martxoaren 12an, Doneztebeko zineman igande arratsaldeko 6:30ean Testurak izeneko bertso saio literarioa. Gai jartzaile: Amaia Agirre. Bertsolariak: Oihana Iguaran, Saioa Alkaiza eta Ane Labaka.