Martxoko lehen larunbatean etxez etxe ibili zen talde polita
Martxoaren lehenengo larunbatean ospatu zituzten Ezkurran inauteriak eta izugarri giro polita izan zuten. Goiz-goizetik talde ederra bildu zen (haur, gazte eta heldu) eta eskean ibili ziren herriko etxeetan musikaz alaiturik. Oso harrera ona izan zuten. Jendeak pozik ireki zizkien bere etxeko ateak, eztarria busti eta tripa betetzeko, bideari jarraitzeko indarrak hartuz.
Arratsaldean haurrak ipuin kontalariaren inguruan bildu ziren eta ondotik jokoak izan zituzten gazte eta helduagoak baserrietan barrena eskean joan ziren bitartean. Ondotik txokolatada ederra prestatu zuten eta gustora ibili ziren dantzan eta jolasean afal ordura arte.
Herri afaria Barranka Ostatuan egin zen eta 65 pertsona inguru bildu ziren inauteri egunari bukaera ederra emateko.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
